Kæru hagaðilar,
Ár eftir ár hefur vegferð okkar verið vörðuð skuldbindingu okkar til að ná góðum rekstrarárangri, á sama tíma og við höfum stöðugt haldið öryggismálunum í brennidepli. Í samfélagsskýrslu síðasta árs deildi ég opinskátt þeim áskorunum sem við stóðum frammi fyrir þegar við stigum út úr COVID-19 tímabilinu og tókumst á við rekstraraðstæður ársins 2023. Þegar litið er til baka yfir árið sem fylgdi er ég stoltur af því að við höfum ekki aðeins staðið við skuldbindingar okkar gagnvart hagsmunaaðilum og náð markmiðunum fyrir árið 2024, heldur farið fram úr væntingum.
Lykillinn að þessum árangri liggur í stefnu sem við innleiddum á síðasta ári – metnaðarfullri en einfaldri nálgun sem byggir á þremur grunnstoðum: FÓLK, STÖÐUGLEIKI og FRAMLEIÐNI. Þessi stefna hefur veitt okkur ákveðna sýn og skýran leiðarvísi sem gerði okkur kleift að vinna samhent að því að ná markmiðum okkar fyrir 2024.
Ein áhrifamesta breytingin sem við réðumst í á árinu var að skerpa á þeirri menningu að STOPPA,
öryggisins vegna. Með því að styrkja og hvetja starfsfólk okkar til að tilkynna atvik og stoppa vinnu hvenær sem það upplifir sig óöruggt, hefur fjöldi skráðra atvika aukist verulega. Þó að það kunni að virðast andstætt markmiðum okkar við fyrstu sýn, gerir þetta okkur kleift að bregðast við mögulegum áhættum áður en alvarleg atvik eiga sér stað. Árangurinn talar sínu máli. Allir helstu öryggismælikvarðar okkar sýna fram á bætingu árið 2024 miðað við árið á undan.
Á sviði umhverfismála innleiddum við fjölda aðgerða til að takast á við þrálátar áskoranir í kerskálanum. Þó að sumt sé enn í vinnslu, höfum við náð verulegum árangri í flúorlosun, sem endaði í 0,329 kg F/tonn Al fyrir árið 2024 – það er undir markmiði okkar um 0,350 kg F/tonn Al og lægra en árið 2023 þegar losunin var 0,348 kg F/tonn Al. Þetta undirstrikar með skýrum hætti skuldbindingu okkar til sjálfbærni og umhverfisábyrgðar.
Fleiri áfangasigrar styrkja trú okkar um að við séum á réttri leið í átt að þeirri sýn sem við vinnum eftir, að Fjarðaál verði eftirsóttasti vinnustaðurinn í samfélaginu okkar. Árið 2024 náðum við að hafa öll ker í rekstri – í fyrsta sinn síðan 2018. Þessi rekstrarstöðugleiki, ásamt umbótum í ferlastýringu og öðrum verkefnum, hefur gert okkur kleift að draga verulega úr orkunotkun, fækka risum í kerum¹ og neyðarskautskiptum². Þá hafa gæði álsins sem við framleiðum náð hæðum sem ekki hafa sést síðan 2011, sem gerir okkur kleift að auka verðmæti þeirra vara sem við framleiðum.
Í steypuskálanum hefur náið samstarf við viðhalds- og áreiðanleikateymi okkar skilað verulegum
umbótum í áreiðanleika búnaðar. Þessi vinna skilaði sér meðal annars í metframleiðslu á víravélinni í nóvember 2024. Þá náðist einnig aukinn stöðugleiki í skautsmiðjunni sem tryggði stöðuga afhendingu rafskauta til kerskálans allt árið um kring.
Á árinu 2025 ætlum við að halda áfram að byggja upp framúrskarandi vinnustað fyrir okkar fólk. Einföld en markviss áhersla á FÓLK, STÖÐUGLEIKA og FRAMLEIÐNI mun áfram vera okkar leiðarljós.
Með öflugri teymisvinnu erum við betur í stakk búin til að mæta sveiflum á mörkuðum sem geta á
endanum haft áhrif á áliðnaðinn. Þó svo að alþjóðlegar og efnahagslegar áskoranir kunni að koma upp höfum við borð fyrir báru, þökk sé góðum og stöðugum rekstri og getum mætt slíkum aðstæðum af öryggi og staðið þannig vörð um nærsamfélagið, umhverfið og hagsmuni viðskiptavina okkar.
Við bjóðum ykkur að fylgja okkur áfram í þessari spennandi vegferð inn í árið 2025 og hlökkum til að fagna fleiri áföngum með ykkur.
Njótið lestursins,
Fernando Costa
forstjóri Fjarðaáls
¹ Ris í kerum er fyrirbæri sem á sér stað í álframleiðslu þegar styrkur áloxíðs í raflausninni fer niður fyrir ákveðin mörk. Þá hækkar spennan í kerinu snögglega og myndast gróðurhúsalofttegundir eins og CF₄ og C₂F₆.
² Neyðarskautskipti eru gerð þegar endingartími kolefnisrafskauta verður styttri en gert er ráð fyrir, t.d. vegna óstöðugleika í keri eða galla í skautinu. Þá þarf að setja nýtt skaut fyrr en áætlað var, sem eykur kolefnisnotkun í framleiðslunni.
