Alcoa Fjarðaál leggur áherslu á opið og virkt samtal við hagsmunaaðila og vill vera fyrirmynd í samfélagsábyrgð með því að skapa jákvæð áhrif á nærsamfélagið. Stjórnendur eiga í reglulegum samskiptum við hagsmunaaðila og funda með þeim um sameiginleg hagsmunamál. Alcoa Fjarðaál og Samfélagssjóður Alcoa (Alcoa Foundation) veita fé til mikilvægra málefna með áherslu á verkefni sem tengjast áhrifasvæði álversins. Alcoa Fjarðaál hefur vaktað samfélagsvísa frá því rekstur álversins hófst.
Alcoa Fjarðaál leggur ríka áherslu á opið, gagnsætt og markvisst samtal við hagsmunaaðila og hefur það að leiðarljósi að vera traustur og ábyrgur þátttakandi í nærsamfélaginu. Fyrirtækið leitast við að skapa jákvæð og varanleg áhrif með því að byggja upp gott samstarf við íbúa, sveitarfélög, stofnanir og félagasamtök í nærsamfélaginu.
Stjórnendur og lykilstarfsmenn eiga í reglulegum og skipulögðum samskiptum viðhelstu hagsmunaaðila, þar sem áhersla er lögð á gagnkvæma upplýsingagjöf og samráð um málefni sem snerta starfsemi fyrirtækisins og þróun samfélagsins. Með þessu er stuðlað að auknu trausti, betri ákvarðanatöku og sameiginlegri sýn um sjálfbæra þróun.
Alcoa Fjarðaál leggur einnig sitt af mörkum til samfélagsins með markvissum fjárframlögum og stuðningi við fjölbreytt verkefni. Í gegnum Samfélagssjóð Fjarðaáls og með styrkjum frá Alcoa Foundation, er lögð sérstök áhersla á verkefni sem efla menntun, umhverfisvernd, lýðheilsu og samfélagsþróun á áhrifasvæði álversins. Við val á verkefnum er horft til langtímaáhrifa og þess hvernig þau styðja við sjálfbærni og velferð samfélagsins.
Fyrirtækið hefur frá upphafi rekstrar vaktað lykilsamfélagsvísa til að meta áhrif starfseminnar á nærsamfélagið. Þessi vöktun nær meðal annars til þátta á borð við atvinnuþátttöku, efnahagsleg áhrif, lýðheilsu, menntun og viðhorf íbúa. Niðurstöður eru nýttar til að greina tækifæri til umbóta og tryggja að starfsemi fyrirtækisins samræmist þörfum og væntingum samfélagsins.
Í byrjun árs 2025 hóf Fjarðaál samskiptaverkefnið Sögur að austan, sem opnar glugga inn í daglegt líf starfsfólks sem vinnur fjölbreytt störf og leggur sitt af mörkum til samfélagsins á Austurlandi. Í stuttum og persónulegum myndböndum segja starfsmenn frá starfi sínu, leiðinni að Fjarðaáli og því sem veitir þeim innblástur í vinnu og leik. Myndböndin birtast reglulega á Facebooksíðu Fjarðaáls, þar sem íbúar geta fylgst með og kynnst fólkinu á bak við verksmiðjuna. Markmiðið er að efla gagnsæi, styrkja tengsl við nærsamfélagið og minna á að árangur Fjarðaáls byggir fyrst og fremst á fólkinu okkar.
Alþjóðlegum baráttudegi kvenna var fagnað hjá Fjarðaáli 8. mars, líkt og undanfarin ár. Í tilefni dagsins var birt sérstakt myndband þar sem konur úr ólíkum deildum sögðu frá starfi sínu, hvað þær kunna best að meta við vinnudaginn og hvaða atriði skipta þær mestu máli í vinnu og leik. Deginum var jafnframt ætlað að minna á mikilvægi jafnréttis í daglegum starfsháttum fyrirtækisins.
Það var líf og fjör á Tæknidegi fjölskyldunnar í Neskaupstað, þar sem hópur starfsfólksFjarðaáls tók á móti forvitnum ogfróðleiksfúsum gestum á öllum aldri.Markmiðið með þátttökunni var að kynnatæknina, störfin og fólkið sem stendur aðbaki rekstrinum á Reyðarfirði, og skapa vettvang þar sem ungir sem aldnir gátu spurt spurninga og prófað sig áfram. Eins og áður vakti fallvarnarbúnaðurinn mikla kátínu og börnin skemmtu sér vel við að prófa búnaðinn í öruggum aðstæðum.
Á árinu 2025 stóð Alcoa Fjarðaál fyrir opnum íbúafundi á Reyðarfirði þar sem íbúum gafst tækifæri til að hitta fulltrúa fyrirtækisins og fá innsýn í starfsemi álversins. Á fundinum voru kynntar helstu áherslur og niðurstöður ársins 2024, auk þess sem stjórnendur sátu fyrir spurningum og ábendingum úr sal. Markmiðið með fundinum var að skapa vettvang fyrir opið samtal við íbúana, efla gagnsæi og styrkja tengsl fyrirtækisins við nærsamfélagið.
Hópur starfsfólks Fjarðaáls tók sér frí frá hefðbundnum störfum í lok maí og hélt árlegan Plokkdag á svæðinu í og við álverið. Plokkað var víða um lóðina þar sem starfsfólk safnaði saman rusli sem hafði fokið til á vetrarmánuðum. Að loknu plokki var þátttakendum boðið upp á kaffi og meðlæti í matsalnum, í þakklætisskyni fyrir vel unnið verk.
Plokkdagurinn er orðinn fastur liður í umhverfis- og samfélagsstarfi Fjarðaáls og minnir á mikilvægi sameiginlegs átaks þegar kemur að því að halda umhverfinu hreinu og snyrtilegu.
Alcoa Fjarðaál hlaut hæstu einkunn í flokki álframleiðenda í Sjálfbærniásnum 2025. Þetta er annað árið í röð sem fyrirtækið hlýtur þessa viðurkenningu, og hækkaði einkunnin töluvert milli ára. Hækkunin endurspeglar aukið traust almennings á sjálfbærniáherslum Fjarðaáls og staðfestir áframhaldandi framfarir í gagnsæi, samfélagsábyrgð og umhverfisstjórnun. Sjálfbærniásinn er mælikvarði sem metur viðhorf almennings til frammistöðu íslenskra fyrirtækja og stofnana í sjálfbærnimálum. Könnunin sem liggur til grundvallar samanstendur af sex spurningum sem meta hvernig neytendur upplifa þátttöku fyrirtækja í samfélagsmálum, hvort þau hagi starfsemi sinni með velferð viðskiptavina að leiðarljósi og hvort þau vinni markvisst að því að draga úr sóun og rekstrarálagi á umhverfið. Niðurstöðurnar gefa mikilvæga vísbendingu um traust og orðspor fyrirtækisins í samfélaginu og hvernig sjálfbærnistefna þess nær til almennings.
Júnímánuður er tileinkaður hinseginleikanum á heimsvísu undir yfirskriftinni PRIDE og tekur Alcoa virkan þátt í að fagnahonum. EAGLE er einn af fjórum inngildingarhópum sem starfræktir eru innan Alcoa á heimsvísu. Í EAGLE er unnið að jafnréttismálum hinsegin fólks í víðu samhengi og baráttumál samtakanna byggjast á virðingu og jöfnum tækifærum. Í tilefni mánaðarins var starfsfólki boðið að taka þátt í skemmtilegu myndaverkefni þar sem hægt var að taka myndir með sérstökum regnbogamyndarömmum. Rammarnir gerðu fólki kleift að sýna stuðning á einfaldan, skapandi og litríkan hátt.
Frá því álverið hóf rekstur hefur skapast hefð fyrir því að bjóða konum á Austurlandi saman á kvenréttindadaginn 19. júní. Árið 2025 hélt Fjarðaál áfram þessari góðu hefð og bauð konum úr nærsamfélaginu í Kvennakaffi í matsal fyrirtækisins þar sem boðið var upp á veitingar og fjölbreytta skemmtidagskrá. Á svið stigu Vigdís Diljá Óskarsdóttir, stjórnandi samskipta og samfélagsmála hjá Fjarðaáli, Líneik Anna Sævarsdóttir, stjórnandi fræðslumála og skólaþjónustu hjá Fjarðabyggð og fyrrum alþingiskona, Birna Guðmundsdóttir, öryggissérfræðingur og tengiliður Alcoa Women’s Network, auk Nönnu Imsland og Friðriks Jónssonar sem sáu um tónlistarflutning og sköpuðu hlýlegt andrúmsloft.
Viðburðurinn dregur fram mikilvægi jafnréttis í daglegum starfsháttum fyrirtækisins og þá staðreynd að markmið Fjarðaáls hefur frá upphafi verið að byggja upp vinnustað þar sem jafnræði, virðing og jöfn tækifæri eru í forgrunni. Það var fyrirtækinu sönn ánægja að bjóða konum á Austurlandi að fagna saman á þessum mikilvæga degi og halda áfram þeirri hefð sem hefur fest sig í sessi sem einn af helstu samfélagsviðburðum ársins.
Bleikur október er árlega helgaður baráttunni gegn brjóstakrabbameini og hefur fest sig í sessi sem mikilvægur hluti forvarnarstarfs og vitundarvakningar á landsvísu. Í október 2025 tók Fjarðaál virkan þátt í málefninu með fræðslu og viðburðum sem tengslanet kvenna hjá Alcoa (Alcoa Women’s Networkeða AWN), einn af fjórum inngildingarhópum Alcoa á heimsvísu, skipulagði.
Þriðjudaginn 21. október heimsótti Hrefna Eyþórsdóttir, formaður Krabbameinsfélags Austfjarða, starfsfólk Fjarðaáls og hélt fræðsluerindi. Hún fór einnig um kaffistofur framleiðslusvæðanna, þar sem starfsmenn gátu kynnt sér forvarnir og fengið svör við spurningum um mikilvægi reglubundinna skimana og öðlast þekkingu á einkennum sjúkdómsins.
Daginn eftir, miðvikudaginn 22. október, var boðið upp á sérstakan bleikan eftirrétt í mötuneytinu í tilefni Bleika dagsins, sem minnti á mikilvægi samstöðu og stuðnings í baráttunni gegn krabbameini.
Starfsmannafélagið Sómi hjá Alcoa Fjarðaáli hélt árlega jólatrésskemmtun dagana 15. og 29. nóvember. Hefðin hefur fest sig í sessi sem einn af skemmtilegustu viðburðum ársins fyrir starfsfólk og fjölskyldur þeirra. Alls mættu 212 manns á fyrri skemmtunina. Aron Leví Beck og Karítas Harpa Davíðsdóttir spiluðu og sungu, auk félaga úr Harmonikkuunnendum í Norðfirði. Skreytt voru 70 piparkökuhús, jólabingóið var á sínum stað og jólasveinar kíktu í heimsókn.
Á hverju ári opnar Alcoa Fjarðaál fyrir umsóknir um svokölluð Action-verkefni. Markmiðið með verkefnunum er að styrkja félagasamtök í nærsamfélaginu og hvetja starfsfólk til sjálfboðastarfa. Starfsmaður sækir um styrk fyrir tilteknu verkefni og hvetur samstarfsfólk til þátttöku. Þegar átta eða fleiri sjálfboðaliðar úr hópi starfsfólks gefa vinnu sína í verkefnið, veitir Fjarðaál félagasamtökunum fjárstyrk til framkvæmdanna.
Á árinu 2025 voru tvö Action-verkefni kláruð og eitt sem þurfti því miður að fresta:
Endurbætur á akstursbrautinni í Mýnesi á Egilsstöðum
Fyrsta Action-verkefni ársins var unnið á æfingasvæði Akstursíþróttaklúbbsins START, þar sem hópur sjálfboðaliða frá Fjarðaáli tók höndum saman við að bæta aðstöðu fyrir öflugt barnastarf klúbbsins. Verkefnið fól meðal annars í sér að grjóthreinsa brautina og lagfæra stikur, merkingar og girðingar. Markmiðið var að tryggja öruggt og aðgengilegt æfingasvæði fyrir yngstu iðkendurna.
Endurreisn við Dagmálalæk á Seyðisfirði
Annað Action-verkefnið fór fram við Dagmálalæk á Seyðisfirði, þar sem unnið var að endurbótum á vinsælu útivistarsvæði. Sjálfboðaliðar fjarlægðu leifar af gömlu skýli, lögðu til hleðslu og undirbjuggu svæðið fyrir nýtt skýli og bætta aðstöðu. Verkefnið stuðlaði að því að skapa fallegt og notalegt svæði sem nýtist bæði íbúum og gestum sem fara um þjóðarleiðina.
Uppsetning körfuboltavallar á Reyðarfirði– frestað vegna veðurs
Áætlað var að halda sérstakt Action-verkefni í samstarfi við Ungmennafélagið Val á Reyðarfirði, þar sem sjálfboðaliðar ætluðu að aðstoða við uppsetningu á nýjum körfuboltavelli á skólalóðinni. Slæmt veður setti þó strik í reikninginn og var verkefninu frestað fram á næsta ár. Verkefnið verður tekið upp að nýju þegar aðstæður leyfa og er áfram mikilvægt skref í að efla útivistar og íþróttaaðstöðu fyrir börn og ungmenni á svæðinu.
Alcoa Fjarðaál hefur greint hagsmunaaðila félagsins með það fyrir augum að meta betur þarfir, áherslur og sameiginlega hagsmuni haghafa. Hagsmunaaðilar skiptast í beina hagsmunaaðila, nærumhverfi, samfélag og alþjóðaumhverfi. Hagsmunaaðilagreining fyrirtækisins var gerð í samstarfi við ráðgjafa á vinnufundum með þverfaglegum hópum starfsfólks. Taldir voru upp hagsmunaaðilar og þeir skilgreindir eftir snertifleti og mikilvægi. Alcoa Fjarðaál er stórt fyrirtæki í litlu samfélagi og því fylgir mikil ábyrgð. Fyrirtækið hefur ávallt lagt mikið upp úr góðum samskiptum við fjölbreytta hópa hagsmunaaðila með reglulegum fundum og samstarfi. Slík tengsl eru lykilþáttur í því að byggja upp traust, styrkja sameiginlega sýn og tryggja að starfsemi álversins hafi jákvæð áhrif á samfélagið til lengri tíma.
Mikilvægt er að sátt ríki um starfsemi fyrirtækisins í nærsamfélaginu. Því skiptir sköpum að rækta það samband á markvissan hátt með samtali og samstarfi. Virkt samtal við samfélagið er ein af meginstoðunum í samfélagsstefnu Alcoa Fjarðaáls og árlega er mæld afstaða íbúa á Austurlandi til fyrirtækisins.
Árlega framkvæmir Gallup ímyndarkönnun sem mælir viðhorf til fyrirtækisins, traust og áhrif á samfélagið. Niðurstöður ársins 2025 sýna að jákvæðni gagnvart fyrirtækinu er áfram mjög sterk.
78,5% svarenda eru jákvæðir gagnvart Alcoa Fjarðaáli, sem er nánast óbreytt frá fyrra ári, og aðeins 5,7% lýsa neikvæðri afstöðu. Meðaltalið er 5,3 sem er verulega hærra en samanburðargrunnur Gallup (4,6). Traust til fyrirtækisins helst einnig sterkt, þó með örlitlum sveiflum: 61,8% bera mikið traust til Alcoa Fjarðaáls, en þeim sem bera lítið traust fækkar lítillega. Áhugavert er að eldri aldurshópar eru jákvæðari og bera meira traust en yngri hópar, þar sem lækkun sést hjá 18–29 ára.
Könnunin sýnir einnig að 92,8% telja að Alcoa Fjarðaál hafi jákvæð áhrif á búsetuskilyrði á Austurlandi, og ánægja með búsetu í fjórðungnum er mjög mikil en 93,3% segjast ánægðir með að búa á Austurlandi. Framlag fyrirtækisins til menningar- og samfélagsmála er metið hátt; 60,9% telja framlagið mikið, og þeim sem telja það „mjög mikið“ fjölgar úr 13,1% í 15,9%.
Þegar spurt er um lykilþætti samfélagsábyrgðar kemur fram að fyrirtækið stendur sig vel í flestum þáttum: 81,3% telja að Alcoa Fjarðaál standi sig vel í heilsu- og öryggismálum, 63% í umhverfismálum og 83,6% í jafnréttismálum. Einnig telja 68,7% að fyrirtækið hvetji starfsfólk til þátttöku í samfélaginu, og 59,2% að það eigi í opnum samskiptum við almenning.
Alcoa Fjarðaál leggur ríka áherslu á að miðla upplýsingum um starfsemi félagsins til íbúa á Austurlandi og annarra haghafa. Útgáfa samfélagsskýrslu er liður í þeirri upplýsingagjöf en þar er greint frá áhrifum starfseminnar á efnahag, umhverfi og samfélag. Alcoa Fjarðaál er jafnframt með síðu á Facebook og nýtir hana til að eiga í gagnvirkum samskiptum og miðla upplýsingum varðandi Alcoa Fjarðaál og áliðnaðinn á Íslandi. Stjórnendur Alcoa Fjarðaáls eiga í reglulegum samskiptum við aðra hagsmunaaðila svo sem bændur á svæðinu, þingmenn kjördæmisins og ráðherra sem hafa með málaflokka fyrirtækisins að gera. Alcoa Fjarðaál er aðili að samtökum álframleiðenda á Íslandi (Samál), Álklasanum, Samtökum iðnaðarins og Samtökum atvinnulífsins.
Góð samskipti og upplýsingagjöf eru lykilþættir í starfseminni bæði innan og utan fyrirtækisins, við starfsfólk jafnt sem verktaka og birgja. Reglulega eru haldnir fundir fyrir allt starfsfólk álversins þar sem fjallað er um málefni og stöðu fyrirtækisins frá ýmsum hliðum. Jafnframt eru reglulegir fundir með verktakafyrirtækjum og birgjum þar sem farið er yfir helstu mál og stöðu í málaflokkum sem tengjast m.a. rekstri fyrirtækisins, umhverfi, heilsu og öryggi.
Hafðu samband
Íbúar eru hvattir til að koma á framfæri ábendingum, fyrirspurnum eða kvörtunum til Alcoa Fjarðaáls. Hægt er að hafa samband við fyrirtækið í gegnum símanúmerið 470 7700, með tölvupósti á fjardaal@alcoa.com eða með því að fara inn á heimasíðu Fjarðaáls, www.alcoa.is og velja þar „Hafðu samband”.
Alcoa Fjarðaál starfrækir styrktarsjóð sem úthlutar styrkjum til samfélagsverkefna á Austurlandi. Árið 2025 veitti Fjarðaál tæplega 53 milljónir króna í samfélagsverkefni afýmsum toga.
Meðal verkefna sem hlutu styrk má nefna Starfsmannafélag Slökkviliðs Fjarðabyggðar, sem fékk styrk til kaupa á SimMan æfingadúkku. Björgunarsveitin
Brimrún fékk styrk til kaupa á kerru undir björgunarfjórhjól. Þá fékk Tónleikafélag Austurlands styrk til tónleika sem styrkja geðheilbrigðismál í fjórðungnum, og Skaftfell listamiðstöð Austurlands, fékk styrk til uppsetningar á hjólastólarampi fyrir utan miðstöðina.
Með þessum styrkjum styður Fjarðaál við fjölbreytt verkefni sem efla öryggi, menningu og velferð í samfélaginu og leggja grunn að sjálfbærri framtíð Austurlands. Á árinu voru greiddar tæplega 28 milljónir króna til íþróttafélaga á Austurlandi. Að auki fóru 3 milljónir króna til jólasjóða Fjarðabyggðar og Múlaþings.
Á árinu 2025 studdi Alcoa Foundation fjölbreytt verkefni sem efla menntun, umhverfisvernd og samfélagsþróun á Austurlandi. Heildarupphæð úthlutaðra styrkja nam um 82 milljónum króna, sem endurspeglar styrki sem samþykktir voru á árinu.
Styrkirnir skiptust í tvo meginflokka, annars vegar verkefni á sviði umhverfis- og náttúruverndar og hins vegar samfélags- og menntaverkefni.
Áherslan á árinu var að styðja verkefni sem byggja upp þekkingu, efla sjálfbæra þróun og styrkja stoðir samfélagsins til framtíðar. Stærstu styrkir ársins fóru til verkefna á sviði náttúruverndar, rannsókna og fræðastarfs. Skálanes, Eastfjords TERN og Verkmenntaskóli Austurlands hlutu öll styrki á árinu 2025 á grundvelli þriggja ára úthlutunarsamninga, þar sem greiddur hluti á árinu nemur um þriðjungi heildarstyrks.
Skálanes fékk tæplega 19 milljón króna styrk til áframhaldandi uppbyggingar fjölnotavísinda-, kennslu- og fræðslumiðstöðvar á Seyðisfirði. Verkefnið styður rannsóknir og fræðslu á sviði náttúruverndar með áherslu á verndun landslags og vistkerfa.
East fjords TERN, fjölþverfaglegt rannsóknaverkefni Southern Connecticut State University, hlaut styrk að upphæð tæplega 42 milljónum króna til rannsókna á líffræðilegri fjölbreytni og vatnsgæðum á Austurlandi með áherslu á sjálfbæra þróun. Verkefnið er unnið í samstarfi við Menntaskólann á Egilsstöðum, sem tekur þátt í gagnasöfnun, vettvangsferðum og fræðslu fyrir nemendur. Með þessu samstarfi er byggður upp mikilvægur brúarstokkur milli alþjóðlegra háskólarannsókna og staðbundinnar menntunar og uppbyggingu þekkingar á Austurlandi.
Þá hlaut Verkmenntaskóli Austurlands styrk upp á rúmlega 14 milljónir til að endurbæta tæknibúnað og kennsluaðstöðu með það að markmiði að endurspegla nútímakröfur iðnaðar- og tæknigreina. Með styrknum verður unnið að því að efla verklega þjálfun, draga skólann og atvinnulífið nær saman og undirbúa nemendur enn betur fyrir tæknistörf framtíðarinnar.
Í flokki samfélagsþátttöku starfsmanna (Employee Engagement) voru veittir styrkir til verkefna sem efla velferð og menningu. Styrkir í þessum flokki eru veittir í samstarfi við mannréttindahópa Alcoa á sviði inngildingar, jafnréttis og fjölbreytileika. Nánari umfjöllun um hópana má finna í mannauðskafla skýrslunnar undir jafnréttismál.
Meðal styrkþega var Sólin, frístundaþjónusta fyrir börn og ungmenni með sérþarfir sem rekin er af Múlaþingi, sem hlaut rúmlega einnar milljónar króna styrk (í samstarfi við mannréttindahópinn ABLE). Austurbrú fékk jafnframt rúmlega einnar milljónar króna styrk til verkefnis sem miðar að því að stuðla að inngildingu og styðja við fjölmenningu með stofnun innflytjendaráðs í öllum sveitarfélögum á Austurlandi og fyrir landsvæðið í heild (í samstarfi við AWARE).
Að auki var Samtökunum 78 veittur úmlega einnar milljónar króna styrkur til fræðsluverkefna á Austurlandi (í samstarfi við EAGLE). Aflið, samtök gegn kynferðis og heimilisofbeldi, naut einnig stuðnings að upphæð rúmlega ein milljón króna (í samstarfi við AWN), og Ungmennafélagið Valur fékk tæplega tveggja milljóna króna styrk (í gegnum Community Impact Campaign). Með þessum styrkjum leggur Alcoa Foundation sitt af mörkum til að styrkja samfélagið og umhverfið í anda sjálfbærni og samvinnu.
Árið 2025 var uppgjörsár í sjálfbærniverkefni Alcoa Fjarðaáls og Landsvirkjunar, sem hefur verið starfrækt frá árinu 2004. Verkefnið hefur frá upphafi fylgst með áhrifum framkvæmda og reksturs Kárahnjúkavirkjunar og álversins í Reyðarfirði á samfélag, umhverfi og efnahag á Austurlandi. Á árinu 2025 vann Austurbrú að heildaruppgjöri verkefnisins þar sem tekin voru saman gögn og þróun síðustu 20 ára, með áherslu á hvernig samfélags-, efnahags og umhverfisvísar hafa breyst á byggingar- og rekstrartíma álversins og virkjunar.
Sjálfbærniverkefnið hefur frá upphafi miðað að því að fylgjast með þróun fjölbreyttra vísa sem gefa skýrar vísbendingar um stöðu og breytingar í samfélagslegum, umhverfislegum og efnahagslegum þáttum á svæðinu. Uppgjörið verður kynnt á árinu 2026 og mun gefa heildstæða yfirsýn yfir áhrif verkefnisins og þær breytingar sem hafa orðið á Austurlandi á þessum tveimur áratugum.
Efla tengsl við íbúa á svæðinu með opnum íbúafundi
Stóðst ekki þar sem ekki var unnt að halda opinn fund vegna COVID-19.
Halda fund með sveitastjórnarfólki á Austurlandi
Stóðst ekki þar sem ekki var unnt að halda slíkan fund vegna COVID-19.
Styðja við stofnun náttúruskóla fyrir börn á Austurlandi
Stóðst ekki þar sem verkefni reyndist ekki styrkhæft samkvæmt reglum Alcoa Foundation. Í staðinn voru veittir auknir fjármunir til Austurbrúar til að styðja við uppbyggingu háskólanáms á Austurlandi.
Halda 19. júní skemmtun til að fagna kosningarrétti kvenna
Markmið stóðst.
Halda ráðstefnu á Austurlandi fyrir stjórnendur fyrirtækja og stofnana
Markmið stóðst ekki og var ákveðið að fresta þessu verkefni um ár.
Skipuleggja veisluhöld í tilefni af 15 ára afmælis Fjarðaáls
Markmið stóðst.
Auglýsa á ný eftir umsóknum um menningar- og samfélagsstyrki á Austurlandi
Fjarðaál auglýsti eftir umsóknum og úthlutaði rúmlega tólf og hálfri milljón í menningar- og samfélagsstyrki árið 2023.
Bjóða upp á sameiginlegan fund með sveitarstjórnar fólki á Austurlandi
Markmiðið náðist ekki vegna breytinga í stjórnendateymi álversins árið 2023 en markmiðið flyst yfir á nýtt ár.
Halda ráðstefnu á Austurlandi fyrir stjórnendur fyrirtækja og stofnana.
Markmiðið náðist ekki af sömu ástæðum og ofangreint markmið.
Bjóða upp á sameiginlegan fund með sveitarstjórnarfólki á Austurlandi
Markmið náðist ekki. Stjórnendur Fjarðaáls áttu þó reglulega fundi með sveitarstjórn Fjarðabyggðar.
Fara í kynningarátak um styrkveitingar og styrkhafa úr sjóðum Alcoa.
Markmiði náðist með aukinni virkni á samfélagsmiðlum þar sem styrkveitingum var komið á framfæri.
Hækka heildarupphæð í samfélagssjóði
Markmiði náðist, heildarupphæð úthlutana hækkaði um rúma milljón króna á milli ára.
Auka sýnileika fyrirtækisins með auglýsingaherferðinni Sögur að Austan og öðru myndbandsefni á ólíkum miðlum.
Markmiðið náðist. Á árinu 2025 varherferðin Sögur að Austan sett í loftið og birtá samfélagsmiðlum Fjarðaáls ásamt öðrustuttmyndbandsefni. Verkefnið jók sýnileikafyrirtækisins og styrkti tengsl við íbúa áAusturlandi.
Festa í sessi árlegan sameiginlegan fund með sveitarstjórnarfólki á Austurlandi.
Markmiði náðist að hluta. Fjarðaál hélt áframreglulegu samtali við sveitarstjórnarfólkí gegnum fundi yfir árið, en árlegursameiginlegur fundur allra sveitarfélaga áAusturlandi náðist ekki að fullu á árinu 2025.
Klára innleiðingu á hnattrænu kerfi samfélagsábyrgðar (Social Performance Management System) í samræmi við ASI staðalinn.
Markmiðið náðist. Árið 2025 var innleiðingu kerfisins lokið í takt við kröfur ASI-staðalsins, og tengt við verklag og ferla í samfélagsstarfi Fjarðaáls.
Samfélagskaflann má finna á bls. 55 – 66.
